बीड, दि.13 (जिमाका) :
13 सप्टेंबर 2025 रोजी बीड मुख्यालयात राष्ट्रीय लोकन्यायालयाचे उद्घाटन कार्यक्रम मा. न्यायमूर्ती श्री.के.सी.संत, उच्च न्यायालय मुंबई, खंडपीठ औरंगाबाद व मा.न्यायमूर्ती श्री.आर.एम.जोशी, उच्च न्यायालय मुंबई, खंडपीठ औरंगाबाद यांच्या हस्ते ऑनलाईनद्वारे करण्यात आले.
सदर उद्घाटन कार्यक्रमास बीड जिल्हा न्यायालयाचे प्रमुख जिल्हा व सत्र न्यायाधीश तथा अध्यक्ष, जिल्हा विधी सेवा प्राधिकरण आनंद एल.यावलकर, तसेच जिल्हा विधी सेवा प्राधिकरणाचे सचिव .डब्ल्यू.ए.सय्यद, तसेच कौटुंबिक न्यायालयाचे न्यायाधीश एल.एस.चव्हाण, बीड मुख्यालयातील सर्व न्यायिक अधिकारी, बीड जिल्हा वकील संघाचे अध्यक्ष .एस.जी.पिसुरे व त्यांचे सर्व पदाधिकारी, विधिज्ञ सदर उदघाटन कार्यक्रमास उपस्थित होते.
महाराष्ट्र राज्य विधी सेवा प्राधिकरण यांच्या निर्देशावरून व . आनंद एल. यावलकर प्रमुख जिल्हा व सत्र न्यायाधीश तथा अध्यक्ष जिल्हा विधी सेवा प्राधिकरण बीड यांच्या मार्गदर्शनाखाली आज दि. 13 सप्टेंबर 2025 रोजी पार पडलेल्या लोक न्यायालयात बीड जिल्हयातुन एकूण. 1301 प्रकरणे तडजोडीने निकाली निघाली आहेत.
बीड जिल्हयातून न्यायालयातील प्रलंबीत प्रकरणांपैकी एकूण 11241 प्रकरणे ठेवण्यात आली होती. यामध्ये दिवाणी, फौजदारी, मोटार अपघात, भुसंपादनाची प्रकरणे, 138 एन.आय.अॅक्टच्या प्रकरणांचा समावेश होता. त्यापैकी 564 प्रकरणे निकाली निघाली आहेत. तर दाखलपुर्व प्रकरणामध्ये एकूण 36317 प्रकरणे ठेवण्यात आली होती. त्यापैकी 737 प्रकरणे निकाली निघाली आहेत. असे एकूण 1301 प्रकरणे निकाली निघाली आहेत व यामध्ये 15 कोटी 68 लाख 66 हजार 605 एवढ्या रकमेची प्रकरणे निकाली निघाली आहेत.
सदरील लोक न्यायालयाच्या यशस्वीतेसाठी मा. श्री. डब्ल्यू.ए.सय्यद, सदस्य सचिव, जिल्हा विधी सेवा प्राधिकरण बीड यांच्यासह बीड मुख्यालयातील सर्व न्यायिक अधिकारी, बीड जिल्हा वकील संघाचे अध्यक्ष मा.श्री. एस.जी.पिसुरे व त्यांचे सर्व सहकारी पदाधिकारी तसेच वकील संघाचे सर्व सदस्य, जिल्हा सरकारी वकील व सर्व सरकारी अभियोक्ता यांची लोकन्यायालयात प्रमुख उपस्थिती होती.
न्यायालयीन कर्मचारी, बॅंक कर्मचारी, पोलीस कर्मचारी व इतर कार्यालयीन कर्मचारी यांनी लोकअदालत यशस्वी करण्यासाठी परिश्रम घेतले.
